Dende a taberna máis tradicional ata a cafetería máis vangardista.
Desfruta das nosas cafeterías de referencia.
Café Bar Horizonte
Un dos establecementos clásicos do noso municipio, cun ambiente acolledor e un trato próximo e familiar. Destacan as súas extraordinarias vistas ao conxunto que forman o areal e lagoa da Frouxeira.
Cafetería - Confitería Campeiras
Especialistas reposteiros, esta cafetería situada no corazón da Porta do Sol destaca pola súa ampla variedade en postres.
Cafetería Somar
Este clásico establecemento, situado no corazón da Porta do Sol, reabría as súas portas en decembro de 2023.
Clandestino Beach&Club
En pleno percorrido polo paseo de madeira que bordea a praia da Frouxeira, a escasos centímetros poderiamos mesmo tocar a súa area desde o Clandestino Beach&Club. Tanto a súa ampla terraza como o seu interior, acristalado dende o chan ata o teito, miran ao Atlántico. Hai mellor razón para gozar dun café ou dun viño nel, sexa inverno ou verán?
El Tumbao
Unha das vistas máis extraordinarias e únicas da Frouxeira. En apenas tres anos de vida, converteuse nun dos mellores e máis exclusivos chiringuitos de praia de toda España.
El Pescador
Ideal para madrugadores pola súa apertura temperá, en xornadas laborais a partir das 5 da mañá, e na fin de semana, dende as 7 horas. Un lugar moi recomendable para arrancar o día con enerxía.
Pub O Garaxe
Un dos pubs emblemáticos de Valdoviño, cunha estética moi coidada e un ambiente inmellorable.
A Roda
O hotel A Roda abre a súa cafetería ao conxunto das persoas que visitan Meirás e aos usuarios e usuarias da praia do Río, xunto á que se levanta. Ten unha terraza cuberta, con vistas a un dos grandes areais de Valdoviño, mirando de fronte á península do Portiño.
Casa Marino
Este bar de toda a vida abre nova etapa tras unha completa posta ao día das súas instalacións, agora cun toque vintage e con tributo á propia historia do local, aberto a comezos dos anos 30.
Cervecería Campo García
Situado en Taraza, nun punto de paso cara á praia do Río, esta cervexería, que conta cunha enorme terraza, é, sen dúbida, un dos locais máis frecuentados de Meirás.
O Bichesco
Esta pequena vinoteca, aberta en 2008, e situada de camiño ás praias de Meirás, preséntase como unha alternativa ideal para tomar unha copa entre amigos e amigas antes de comer.
Bar Cafetería Aqualón
Un clásico ao pé da praia de Pantín, escenario do mítico Pantín Classic, inspiración da coidada decoración do local. A cada milímetro respírase surf neste espazo.
Café Bar Ramos
Un lugar único para gozar con tranquilidade dun bo café ou para tomar un bo viño.
Cafetería A Torre do Lago
Cunha coidada e moderna estética, esta cafetería dispón de diversos espazos que conforman diferentes ambientes, tanto no interior como no seu exterior.
La Piruliña
Un alto na viaxe en Lago, de camiño ou de regreso á praia, para repoñer forzas. Poderás degustar un saboroso café ou tomar un bo viño, sempre acompañado dun petisco.
A Cepa
Esta cervexaría ten entre os veciños e veciñas da parroquia de Sequeiro a súa principal clientela. O seu emprazamento, na principal vía de comunicación de Valdoviño, fai que sexa tamén punto de parada de visitantes e persoas traballadoras.
Café Bar O Coval
Unhas amplas instalacións cunha decoración coidada do máis enxebre, coa pedra á vista e lareira. Cunha ampla terraza. Situado nun ambiente tranquilo, en plena natureza.
Bar La Explanada
Que tal un almorzo ou un bo xantar coas mellores vistas da praia de Vilarrube? Pois darse ese capricho é posible en La explanada, todo un clásico estival. Fundado na década dos 80, o local conta cunha terraza de luxo e no verán funciona a diario.
Bar Suízo
Constitúe unha opción idónea para tomarse un café, unha cervexa ou un bo viño, aos que sempre acompaña o correspondente pincho.
Teleclub Vilaboa
Conta cunha clientela fiel, de marcado carácter interxeracional. De feito, é un lugar de reunión habitual dos máis novos e novas as fins de semana.
Sala Maravilla
A histórica sala de festas de Vilaboa, pola que desde o ano 1955 pasaron artistas e orquestras de primeira fila, reabre as súas portas en formato discoteca.