Concello e Subdelegación do Goberno analizan o plan de seguridade dos accesos e aforos das praias de Valdoviño

O Concello de Valdoviño e a Subdelegación do Goberno na Coruña analizaron o plan de seguridade das praias do municipio nunha Xunta Local de Seguridade extraordinaria que tivo como único punto da orde do día a análise desta iniciativa desenvolvida polo Goberno Local.
 
A principal finalidade do plan consiste no control dos accesos e aforos das praias, tendo en conta ademáis que Valdoviño conta con 25 quilómetros de costa e 17 areais cunha importante afluencia de usuarios/as. Dada a actual situación derivada da crise sanitaria da COVID-19 e que o litoral do Concello está incluído na Rede Natura 2000, establécese coma prioritaria a seguridade dos areais e dos seus usuarios.
 
Para este fin o Concello elaborou un plan de seguridade dos accesos e aforos ás praias, facendo uso das súas atribucións e competencias, de tal maneira que a partir do próximo mes de xullo o acceso ás praias quedará regulado pola nova normativa.
 
Unha das principais premisas do plan consiste na habilitación de aparcadoiros de carácter público, que funcionarán de 8 a 21 horas e estarán situados en espazos públicos ou privados de uso público, quedando prohibido estacionar en calquera espacio non sinalizado ou adaptado para este fin. Estes aparcadoiros estarán controlados por persoal privado que terá funcións de auxiliares de policía local. O dispositivo contará ademáis coa participación da Policía Local, Policía Nacional Adscrita á Comunidade (Policía Autonómica) e Garda Civil.
 
Tamén quedará prohibido o aparcamento en espazos privados que non conten con vivendas ou edificacións, ademáis de restrinxirse a estancia de noite nos aparcadoiros e a presenza de autocaravanas, que só poderán estacionar nos espazos delimitados expresamente.
 
O plan tamén establece a prohibición de desplegar mesas, cadeiras ou outros elementos para comer na praia e os xogos de pelotas, raquetas, etc., para desta forma garantir a distancia social.
 
O Concello ten previsto, de acordo coa Xunta, a ampliación do servizo público de buses para facilitar o acceso dos/as bañistas e contribuír á limitación de uso do vehículo privado. Ademáis, reforzará a sinalización derivada do desenvolvemento destas iniciativas.
 
Nove praias formarán parte do plan de xeito principal: Campelo, O Río, Mourillá, Cristina, Outeiro, Frouxeira, O Rodo, Baleo e Vilarrube, que contan cun total de 168.500 metros cadrados de arenais, nos que quedou establecido un aforo máximo total de 42.125 persoas.
 
Para o establecemento deste aforo tivéronse en conta, ademáis da propia superficie, aspectos como o número de empadroados por parroquia, o número de vivendas por cada unha das parroquias, o número aproximado de persoas vencelladas ás segundas residencias, o número de prazas de aloxamentos turísticos, como factores que permiten coñecer a estimación das persoas susceptibles de achegarse ás praias nun momento determinado.
 
Estes factores foron utilizados para delimitar as áreas de aparcadoiros necesarias. Así, haberá máis dunha trintena de zonas para estacionar, que estarán reservadas para uso dos residentes e para uso libre, ademáis de dar cabida a outros vehículos autorizados de uso municipal ou emerxencias.
 
O plan foi analizado de maneira especial polos representantes das Forzas e Corpos de Seguridade. A subdelegada do Goberno na Coruña, Pilar López-Rioboo, destacou o ambicioso da iniciativa e mostrou a súa pública felicitación ao alcalde polo esforzo e traballo desenvolvido para levar a cabo esta iniciativa, que calificou de imprescindible e fundamental para garantir o bo uso dos areais e de maneira especial a seguridade das persoas usuarias, xa que o fin primordial é velar polas súas correctas condicións sanitarias por enriba doutras consideracións.
 
Non obstante, recordou que esta circunstancia pasa fundamentalmente pola concienciación e implicación dos propios bañistas e usuarios dos areais, aos que insta a cumprir as directrices do plan.