A Casa da Cultura acolle a reestrea do documental "Laguna y entorno de Valdoviño"

Coincidindo coa súa nominación á mellor curtametraxe do Festival Internacional de Cine de Daroca, en Zaragoza, a Casa da Cultura acollerá este venres 6 de setembro a reestrea do documental «Laguna y entorno de Valdoviño», obra de José Roberto Fernández López. A proxección terá lugar a partir das 20,30 horas con entrada de balde e o público poderá coñecer de primeira man un traballo único sobre unha contorna igualmente singular.
 
A curta dirixida e producida por Fernández López foi seleccionada entre 730 traballos procedentes de 45 países e é o público o que decidirá o gañador do certame. Será a través da votación aberta na páxina www.festivalcinedaroca.com. Así, as persoas interesadas poden votar ata o 30 de setembro.
 
O documental presenta a lagoa da Frouxeira e a súa contorna para, de seguido, dar paso aos acontecementos que suceden neste espazo protexido ao longo dun ano. O número e comportamento das especies varía en cada estación e destacan algunhas condutas pouco coñecidas e as dificultades do chorlitejo patinegro, unha especie a día de hoxe con poucas parellas reprodutoras en toda Galicia.
 
Son diversos os perigos aos que se enfronta, pero no documental amósase que é posible a súa protección e o goce da natureza.
 
As persoas interesadas en descubrilo tan só teñen que achegarse este venres á Casa da Cultura.