O Concello saca a contratación as obras para habilitar o primeiro Centro Sociocomunitario de Valdoviño no antigo mercado municipal

O alcalde, Alberto González, informou esta mañá de que o Concello vén de sacar a contratación as obras da primeira e da segunda fase para dotar a Valdoviño do seu primeiro Centro Sociocomunitario. Será mediante a reconversión integral do antigo mercado municipal, un inmoble que recuperará así uso para a veciñanza. Cunha posición estratéxica, as dependencias sitúanse á entrada da parroquia de Valdoviño, na estrada de Cedeira, e na área de influencia do Centro de Saúde, do Auditorio, do Museo do Surf e da Casa da Cultura. Actualmente alberga as dependencias da Garda Civil e do Xulgado de Paz, aínda que a maior parte da súa superficie, noutrora mercado, perderon a súa funcionalidade tras a xubilación da titular do único negocio que durante anos ocupou o inmoble. Así, hoxe en día, o Concello utiliza o local como almacén municipal. Unha situación que mudará nos próximos meses.
 
Nesta liña, Alberto González explica que o equipo de goberno leva traballando tres anos no proxecto. Un tempo no que se redactou o proxecto constructivo e se xestionou con éxito a financiación para a primeira e a segunda fase. Agora, licítanse estes traballos por un importe total de 275.206,61 euros. Deles, o Concello destinará 197.588,14 euros da achega provincial 2017 e, os 67.500 euros restantes, serán aportados pola Consellería de Política Social vía convenio.
 
A primeira e a segunda fase do proxecto contemplan, a grandes rasgos, ampliar a superficie útil mediante a cubrición da zona de soportais do exterior, a demolición das escaleiras de acceso e a construción dunhas novas, comunicar a nova planta baixa coa primeira a través dun ascensor e crear nese primeiro andar un espazo diáfano. Así mesmo, estes traballos completaranse cunha terceira fase, orzamentada nuns 500.000 euros, e que prevé a construción dunha segunda planta que comunique a través dun pasillo en altura co inmoble da Casa da Cultura.
 
Neste contexto, o alcalde avanza que a edificación destinarase a usos asociativos, de ocio, culturais e mesmo deportivos. Tamén será un espazo de encontro, reunión e actividade para os veciños e veciñas da Terceira Idade. Compatibilizará estes usos coa celebración de charlas divulgativas, accións formativas…
 
Por último, o rexidor apunta que esta intervención permitiralle ó Concello dispor dun espazo propio e evitar así o aluguer de locais privados para uso municipal, o que suporá un aforro para as arcas municipais.