Valdoviño aproba un orzamento de 6,1 millóns

A corporación deu luz verde ó documento económico sen votos en contra e coa prioridade no gasto social, que ascende a 827.000 euros
 
As contas para o presente exercicio presentan un superávit inicial, cunha estimación de gasto de 5,7 millóns, e a conxelación de tasas
 
O Concello de Valdoviño aprobou uns orzamentos de 6.124.741 euros para o 2018. As contas para o presente exercicio saíron adiante en sesión plenaria sen ningún voto en contra (cos sete síes de PSOE e BNG e outras seis abstencións do resto de grupos). Apróbase cun superávit inicial, xa que a previsión de gasto estabécese en 5,7 millóns de euros, e contemplan a conxelación de tasas e impostos. En liñas xerais, o alcalde, Alberto González, explicou que os novos orzamentos permitirán profundizar no obxectivo marcado polo goberno municipal: atraer e fixar poboación en Valdoviño, ofrecendo servizos de calidade e priorizar o gasto social. Respecto a este último, apunta que o capítulo destinado a Servizos Sociais ascende a 827.000 euros, que permitirán mellorar e ampliar os programas de atención social e tamén a atención coa contratación dun/ha traballador/a social e un/ha educador/a familiar.
 
Así mesmo, os orzamentos suben dos 5,1 millóns do 2017 ós 6,1 para o presente exercicio, así como a previsión de gastos, dende os 4,9 ós 5,7 millóns. Nesta liña, Alberto González destacou a situación de normalidade e estabilidade orzamentaria do municipio, tras as duras medidas e restricións aplicadas entre 2015 e 2017. Atrás queda o plan económico financiero ó que se viu obrigado o Concello ó principio desta lexislatura para afrontar unha situación económica precaria con devolución de axudas por non ter xustificados gastos ou cumprimento de sentenzas xudiciais firmes que condeaban á Administración local a abonos importantes a terceiros. Un plan co que se reduciron drásticamente gastos e optimizaron recursos. Tras diversas prórrogas de orzamento, o pasado ano o Concello iniciaba o exercicio con contas novas e, por tanto, novas liñas de actuación municipal. Unhas liñas que continúan e profundizan en obxectivos neste 2018.
 
Así mesmo, os orzamentos contemplan unha serie de investimentos vinculados principalmente ás axudas procedentes doutras administracións, especialmente Deputación provincial da Coruña e Xunta. Entre estas, o acondicionamento dunhas 40 pistas, camiños e rúas en todas e cada unha das parroquias por 350.000 euros; a contrución do primeiro campo de fútbol de herba artificial ; a mellora da iluminación pública en todo o núcleo de A Carreira e máis na estrada AC566, en Sequeiro e dende Robles ata a Porta do Sol, ou a rehabilitación do antigo mercado para convertelo no primeiro centro sociocomunitario do municipio.
 
Agora, o documento pasará a exposición pública para a presentación de alegacións.