O Concello abre o prazo de inscrición no Festival de Comparsas de Valdoviño

A Concellería de Cultura de Valdoviño abrirá o luns, 5 de febreiro o prazo de inscrición no XVIII Festival de Comparsas, que terá lugar o sábado 17 de febreiro. Para formalizala deben presentar a documentación requerida na Casa da Cultura antes do día 15. O horario de atención é de luns a venres de 10 a 14 horas e o martes 6 tamén de 15 a 17 h. Ademais, o martes 13 o centro permanecerá cerrado ó ser festivo local.
 
O Festival de Comparsas repartirá 3.300 euros en axudas á participación -300 euros máximo por comparsa, 150 nun vale para a mellor e outros 150 en tres vales de 50 canxeables no comercio local para os mellores disfraces individuais-. Haberá tres categorías: comparsas adultos, comparsas infantís e outros. Nesta última categoría entran os disfrazados a título individual, as parellas de disfraces e grupos de ata cinco persoas. A título de disfrace individual non se admitirán menores. Porén, estes si poderán formar parte de parellas ou grupos sempre e cando o número de adultos sexa como mínimo do 50%. A parella ou grupo deberá de manter unha uniformidade de criterio na súa indumentaria. Toda a información e impresos están dispoñibles nesta convocatoria: Bases do XVIII Festival do Entroido 2018.
 
O festival arrancará ás 17:30 h cun pasarrúas entre a casa consistorial e a Casa da Cultura. Neste último espazo habilitarase unha carpa para acoller o festival propiamente dito, que estará conducido polo cómico galego Pedro Brandariz. Cada comparsa interpretará ante o público un máximo de dúas cancións ou parodias ou ben, unha parodia e unha canción. Así mesmo, polo menos unha delas terá que estar escrita e interpretada en linga galega e unha delas xirar en torno a Valdoviño.
 
O xurado estará integrado por un representante de cada unha das comparsas, que poderá votar a todas menos a aquela que representa. En todo caso, terán en conta a orixinalidade e vistosidade do disfrace, a posta en escena, as letras das cancións ou parodias, a simpatía e a animación de rúa que realice o grupo participante.