O Concello inviste máis de 23.000 euros na incorporación de LEDs ó alumeado público

O Concello de Valdoviño procederá á renovación do alumeado público na zona do Carballal e Avenida Areeiros –ata a igrexa de Santa Eulalia- por outro LED de baixo consumo. Unha intervención orzamentada en 23.159,40 euros coa que se pretende un triple obxectivo: protección do medio ambiente; menor consumo e por tanto unha rebaixa na factura eléctrica, e mellora da iluminación dos viais para a circulación de peóns e vehículos. O Boletín Oficial da Provincia publicaba onte o anuncio de licitación do proxecto, que se financiará con cargo ó Plan Provincial de Medio Ambiente (PMA) da Deputación.
 
Esta intervención, que comprende traballos complementarios como a revisión dos cadros para o cumprimento do actual Regulamento Electrotécnico de Baixa Tensión, súmase a outras actuacións levadas a cabo polo Concello nos últimos meses. A última, a substitución de lámpadas na Avenida de Valdoviño ó seu paso pola Porta do Sol.