O Concello abre este luns a inscrición na XVIII Andada a San Andrés de Teixido

O Concello de Valdoviño organiza un ano máis a Andada a San Andrés de Teixido. Será a XVIII edición e celebrarase o sábado, 23 de setembro. O prazo de inscrición abrirase o vindeiro luns, 11 de setembro, e os interesados deben dirixirse á Casa da Cultura para retirar a documentación –máximo 5 por persoa- en horario de 9 a 13 horas. O prazo remata o 19 de setembro, e hai límite de prazas. Iranse formalizando por orde de inscrición e farase unha lista de reserva cos interesados que ficasen sen praza.
 
A inscrición quedará formalizada cando se presente o recibo de pagamento da cota e demais documentación na Casa da Cultura. Esa cota será de 12 ou 10 euros segundo o participante use ou non o autocar de volta para Valdoviño. E, dende o Concello, sinálase que unha vez formalizada a inscrición non se devolverá o importe, así como que se a persoa se dá de baixa non poderá transferir a súa inscrición a outra. Ademais, os menores de idade deberán presentar autorización dos pais ou titores, tendo que participar acompañados dun adulto.
 
A Andada comezará ás 8 horas no aparcadoiro ubicado fronte á Casa Joselito. Será o punto de partida da camiñada, duns 28 quilómetros. Percorrerase o Camiño Histórico ata San Andrés, onde os participantes poderán disfrutar do xantar. A excursión inclúe tamén unha visita á Capela da Fame e avituallamento.
 
O regreso está previsto para as 18,30 horas e recoméndase levar roupa cómoda e calzado adaptado.
 
Para solventar dúbidas, o Concello pon a disposición dos interesados os teléfonos 981 48 76 66 e 645 305 229.