O Baleo-Punta Chirlateira, entre o mar e a ría

  • Distancia: 6,2 km.
  • Tempo estimado: 02h15’ a pé.
  • Altitude (máxima/mínima): 135 m / 16 m.
  • Desnivel acumulado: 282 m.
  • Pendente (máxima/mínima): 25,30% subida, 20,21% baixada.
  • Accesibilidade: A pé, bicicleta, 4x4.
  • Partida e chegada: 43º 38.644N, 008º 06.037W.

 
Sendeiro circular cun trazado de 6 quilómetros de lonxitude que transcorren entre a praia do Baleo e Punta Chirlateira. Parte deste percorrido transcorre por camiños de pescadores nas proximidades dos cantís, polo que se recomenda a máxima precaución á hora de realizalo.

Km 0,000 Este sendeiro arranca dende o aparcadoiro da praia do Baleo deixando a praia e a súa área de recreo á nosa esquerda. O camiño asfaltado ten pendente do 7% cara a arriba. A medida que imos subindo mellora a nosa visión da praia.

Km 0,832 Detemos o noso camiñar no miradoiro. A partir deste punto o camiño continua "picando" cara a arriba e a pendente faise máis pronunciada, chegando a alcanzar nalgúns puntos o 18%.

Km 1,710 Novo miradoiro que nos permite outear cara á dereita o percorrido que nos queda por diante. Tomamos o sendeiro que hai, entre piñeiros, á dereita do miradoiro e deixamos de momento o asfalto. O camiño faise de terra e estes primeiros 100 metros cubrímolos baixo a sombra das árbores.

De entre todos os sendeiros que nos van saíndo ao paso tomamos aquel que se dirixa sempre de fronte, cara ao promontorio que temos diante. Ata chegar ao quilómetro 2,415, no que debemos de decidir se rodeamos o promontorio pola dereita ou pola esquerda.

A partir deste punto imos bordeando o promontorio por camiños de pescadores que pasan paralelos aos cantís. Gozade da paisaxe tanto dun lado coma do outro. Valdoviño, co faro de Meirás, á dereita e Cedeira, co seu porto e a súa ermida de San Antonio, á esquerda. Á fronte Punta Chirlateira e a inmensidade do mar, detrás a praia de Vilarrube. Todo un espectáculo panorámico de 360º.

Unha vez dada a volta ao promontorio debemos de estar no km 3,600, onde nos volvemos encontrar o cruzamento no que anteriormente tomamos á dereita. Agora volvémolo tomar cara á dereita, e dende aquí ímonos ata o punto de partida, facendo o percorrido en sentido inverso.

Km 6,126 Aparcadoiro da praia do Baleo. Chegada.