News and calendar events are only written in Galician language

Espectáculo de danza e circo contemporáneo este domingo no parque da Frouxeira

O parque da praia da Frouxeira albergará este domingo, 29 de xullo, o espectáculo «Up2down», a cargo da compañía Traspediante. Unha función de danza e circo contemporáneo no que o humor e a danza interactúan cunha disciplina circense nova en Galicia: o funanbulismo. Será a partir das 19,30 horas, no marco do programa municipal cultural «Escenarios Paralelos», e co apoio da Deputación a través da Rede Cultural.
 

O Concello abre o prazo de inscrición nun curso de verán de tiro con arco

Curso verán tiro con arco

O Concello de Valdoviño, a través da Concellería de Deportes, promove un curso de verán de tiro con arco. Será o Club Arco A Frouxeira o encargado de impartir as clases no campo municipal de fútbol de Mourente, do 6 ó 10 de agosto e de luns a venres. Os horarios previstos serán de 11 a 13 horas e está dirixido a persoas de todas as idades.
 
Así, o prazo de inscrición xa está aberto ata o 3 de agosto e o trámite debe realizarse no Rexistro Xeral da Casa Consistorial. Para máis información, o Concello habilitou o número de teléfono 626 465 531.
 

Cursos de vela no encoro das Forcadas

O Concello de Valdoviño vén de ampliar o prazo de inscrición nos cursos da campaña de vela 2018 da Deputación provincial da Coruña, que se celebrarán no encoro das Forcadas do 6 ó 10 de agosto. Neles poden participar rapaces e rapazas entre os 9 e os 18 anos, ambas idades incluídas. Deste xeito, a rapazada interesada nos cursos debe formalizar a inscrición no Concello.

Proxección este xoves pola noite do filme “Arrugas” na praza da Casa da Cultura

Arrugas

O Concello de Valdoviño, a través da Concellería de Cultura, convida á veciñanza a unha nova sesión de cine nocturno ó aire libre. Será mañá xoves, 26 de xullo, a partir das 22,30 horas. Na praza da Casa da Cultura proxectarase a película «Arrugas», para todos os públicos e cunha duración de 80 minutos. O pase conta coa colaboración da Deputación Provincial da Coruña, a través da Rede Cultural, e en caso de choiva celebraríase no interior do auditorio do centro cultural.
 

Meirás celebra esta fin de semana a décima edición da súa Festa do Percebe

Festa do Percebe Meirás 2018

Meirás celebra esta fin de semana unha nova edición da súa Festa do Percebe. Será a décima e, como é tradición, estará organizada pola Asociación de Percebeiros de Meirás coa colaboración da Concellería de Turismo do Concello de Valdoviño e establecementos hostaleiros e de comercio. Desenvolverase durante o sábado 28 e o domingo 29, no campo da festa do Porto, na parroquia de Meirás. E, nesas xornadas, a celebración dará comezo a partir das 12 horas.
 

Pages

Subscribe to Concello de Valdoviño RSS